تنسيقات عملية \ everyday work outfit

by Faiza - الأحد, أكتوبر 25, 2015

أسعد الله أوقاتكم بكل خير..
بدات الدوامات و بدأ الروتين الطبيعي يرجع بالتدريج... فيه ناس حتى بالويك اند تخبص روتينها فوق تحت.
في هالموضوع أحب أعرض لكم بعض تنسيقاتي للدوام بشكل عملي ومريح.
شخصيا ألبس حسب المود و النفسية.. ممكن أجهز لبسي من الليل و أغيره الصبح..
لكن الألوان ودرجاتها غالبا الأبيض والأسود والبيج هي اللي تمثلني في العمل كونها رسمية أكثر ولا مانع طبعا من كسر الرتابة أحيانا ببعض الألوان مثل الكموني أو الزيتي والاحمر و الأزرق..

بعض الأمور تحكم مثل أن يترك مظهري انطباع.. مثلا مقابلات العمل تحتاج رسمية أكثر، أو مضغوطة وطول اليوم على المكتب فألبس لبس مريح... وأوقات الشغل خفيف ننسق على رواق..

في النهاية التنسيق الخاص بالدراسة أو بالعمل، يفترض أنه لا يهدف للإبهار أو لفت الأنظار أبدا بقدر ما يهدف لتمثيل منهجك وشخصيتك في العمل وذوقك الخاص.

من القطع المفضلة كثير عندي.. بنطلون الجينز بكل ألوانه و درجاته و قصاته.. عندي هوس بشكل مو طبيعي ...عندي تقريبا أكثر من 9 جينزات اللي لونها أزرق بس (ما حسبت الألوان الثانية).. وغالبا أتعلق نفسيا بواحد أو اثنين منها وأكرفهم..ألبسهم مع كل شي.

الجاكيت الرسمي دائما حاضر.. لأنه بنظري ينقل اللوك تماما من كاجوال إلى فورمال أكثر.. فحتى لو ما كنت أخطط ألبسه غالبا راح أشيله معي.

أخيرا .. الصور معظمها من السناب شات أو الانستقرام.
أتمنى تكون ملهمة لكم...