مدونة فوز

هالتدوينة غير مخطط لها أبدا، اعذروني إذا كان فيه خلل في بناء الموضوع لأني كتبتها بدون مراجعة.
بعد تدوينة كيف تقيسين الصدرية؟ وكيف تختارين البرا المناسب لك؟
جتني وحدة على الدايركت بسألك سؤال خاص و بليز ردي.. قلت لها خير ..قالت ما أعرف أختار الستيان؟! بصراحة استغربت.. قلت يمكن مراهقة توها..أو في مرحلة جسمها قاعد يتغير سواء رجيم أو حمل.
بعد فترة وحدة سألت بالسناب لما صورت من لاسنزا.. قالت وشو أفضل محل ملابس داخلية؟ ووش أفضل خامة؟.. أيضا استغربت..
قلت أوضح بعض الأمور في تدوينة تكمل التدوينة السابقة.

كيف أختار الستيان؟
حسب احتياج جسمك.. لا تفتكرين أنك ملزمة بشكل واحد.. أهم شي تكون قصات تكون فت و مناسبة لك وخامات مريحة.. وهذا يقتضي أنك تعرفين قياس الصدرية صح.

كيف أختار الخامة المناسبة؟
مثل ما ذكرت سابقا.
الخامات أنواع.. فيه القطن وفيه الحرير والساتان والدانتيل والجوبير و الشيفون والبوليستر.
طبعا أفضلهم القطن لكن مو معناها ما تشترين أبدا غيره..
عن نفسي..في البيت أفضل أبقى بدون برا.. ولو لبست ألبس قطني منيمايزر بدون واير معدني أو قصة تي شيرت.. وقت الخرجات أحب الألوان البيسك اللي تجي بدون حواف خياطة بأي خامة كانت والبوش أب.
الخيارات واسعة..تهمني الجودة في أي تصميم أو خامة.
ما أحب القطن الخفيف اللي يتهتك بعد كم غسلة.. ولا أحب القطع المليانة رسومات وألوان تبهت بعد فترة.. ولا أحب البوليستر و النايلون والاسترتشات.. لأنها تتفاعل مع العرق و تحسس الجلد.