ولو سألنا وبحثنا راح نكتشف أن الرجال ينجذبون للمرأة اللي تهتم بنفسها أكثر من اهتمامها بهم، وأن المرأة المهتمة بنفسها ثقتها بنفسها أعلى و تعاني من ضغوط أقل.. لأنها تفكر بنفسها بدل لا تفكر وش صار مع فلان ولا وين راح علان ومستمتعة بحياتها أكثر.

طيب كيف؟ كيف نحقق هذا الأمر؟ ثقة، راحة نفسية، تقبل الذات، استمتاع بالحياة أكثر؟

إيش الفايدة الوحدة تحذف مادة وتأجلها أو تنعزل اجتماعيا أو ترجع من بيت أهلها بعد زعل، أو تخلص النفاس و تصبغ وتقص و .. و .. والقلوب مليانة ومهمومة والنفسية مثل ماهي ؟

ما أدعي أني ممكن أغير ..
 لكني بحثت وقرأت وثقفت نفسي وتعلمت من مشاكل وأخطاء غيري، إلى أن كونت خطوطي الخاصة للشخصية اللي أطمح أكونها.
أيضا ما أدعي أني طبقت الأمور اللي بذكرها 100% .. 

إلا ماتمر على الإنسان ظروف ومواقف تخليه يغير ردات فعله أو تصرفاته أو يسلك مسلك غير اللي رسمه لنفسه، لكني أجتهد مع نفسي وأحاول أحافظ على الصورة اللي أبغى أكونها في بالي.. 
أيضا لأني أعرف أن اهتمامي بنفسي يخليني سعيدة ومرتاحة وأني قدمت لها شيء تستحقه، ويزيد من انتاجيتي في بيتي و فعاليتي مع غيري.

حتى تكوني إنسانة جديدة تماما :

1- التفكير الجديد والنوايا الجديدة

2- الشخصية الجديدة

3- الشكل الجديد

بادئ ذي بدء، اعملي عصف ذهني ( العصف الذهني هو التفكير بعشوائية في موضوع معين ومحاولة جمع أكبر قدر من الأفكار )
فكري وتأملي (والأفضل تسجلين في جوال أو دفتر)..
ما هي نقاط ضعف شخصيتك؟ ماهي ردات الفعل التي ندمتي عليها؟ وإيش سبب ندمك؟ ماهي الأمور أو الصفات التي تقلق راحتك في نفسك وفي ذاتك وشخصيتك؟ ما مدى ثقتك بنفسك؟
ثم قرري كل الأمور اللي تبغي تصلحيها في حياتك ( نفسي، ديني، اجتماعي، صحي، سلوكي...إلخ) 
هذي كلها بتكون شكلك الجديد و شخصيتك الجديدة عشان كذا خليك صريحة وصادقة مع نفسك لأقصى درجة.. لا تنكرين عيوبك أو تفكرين بصورة مثالية.. كلنا عندنا عيوب و أخطاء ونقائص ..وضروري تكونين جادة وحاسمة وعازمة للأفضل

1- التفكير الجديد والنوايا الجديدة:

يوجد في علم النفس والتطوير أنماط  التفكير أو (patterns of thinking)  في محاولة من العلماء والمختصين تصنيف طرق تفكير الناس السلبية:

1- الحياة سيئة: هو تفكير ينظر للحياة بشكل متشائم وسوداوي.. مثال : حياتي تعيسة، الناس مافيها خير، الرجال خونة ليش نتزوج، مافيه وظايف ليش ندرس.

2- خاتمة لا أساس لها : هو تفكير يقفز لخواتم الأمور بدون أدلة، ويرفض أي أفكار جديدة من الآخرين لأنه يجزم تماما بأن نواياهم سيئة بدون أي شيء يثبت .. مثلا: هذي قاصة شعرها بوي معناتها بويه و وتتجنبها وتتصرف معاها على أنها فعلا بويه وهي ماعرفت البنت حتى، مجرد افترضت وصدقت افتراضها!.. أو مثلا مرضت  أو أجهضت أو تساقط شعرها أو..أو..فتقرر بأنها محسودة أو مسحورة وتبدأ تهمل أشياء كثير في حياتها بحجة السحر والحسد وهي حتى ما تأكدت ولا فيه أي شيء يثبت هذا الأمر! وهذا كثير نمارسه في حياتنا.

3- مافيه شي حلو يحصل لي: هو تفكيرك بأنك ماراح تحصلين على أي شي تطمحين له وأن حياتك ماراح تتغير، وإيمان عميق بأنك مو لازم تسعين وتعملين لأنك ماراح تغيرين أي شي فيك أو في حياتك وحولك.. مثال: عشنا بفقر وبنموت بفقر، ماراح أتوظف لأني ماكملت دراستي... هذا تخاذل!

4- الصورة النفسية السيئة عن النفس: أعتبره شخصيا جلد للذات و حط من شأنها.. لأن كل تفكيرك لنفسك سلبي في سلبي .. مثلا: ماراح أرفع يدي وأجاوب السؤال لأني غبية واحتمال إجابتي غلط، ماراح أتزوج لأني مو حلوة، أبوي وأمي يكرهوني ماله داعي أجلس معاهم على السفرة.

5- المفروض..، ممكن..، لكن..: لما تعرفين وش تبين تسوين واللي المفروض تسوينه وبمقدورك انك تسوينه لكن لسبب أو لآخر تأجلينه وتسوفينه .. مثلا: المفروض أتخرج هالسنة، بس حصلت لي ظروف وأجلت التخرج للسنة الجاية، أدري لازم أهتم بنفسي بالشتاء أكثر بس ماعندي وقت.. أتوقع كلنا نعرف ناس كثير بهالطريقة وغالبا عذرهم بالتأجيل غير مقبول إما بسبب قلة الإصرار وانعدام العزيمة أو عاجبهم وضعهم.

6- التفكير بناء على العاطفة: هو بكل بساطة تفكيرك عن نفسك بناء على عواطفك.. يتشابه تقريبا مع الصورة النفسية السيئة عن النفس.. أحس اني ما أقدر أصير كذا، معناها أكيد احساسي صحيح أنا ما أقدر! ..أحس اني فاشلة، خلاص ماراح أكمل لأن المشروع بيفشل أكيد! 

7- كله مني: هو التفكير بأن كل شي سلبي و غلط يصير لك بسببك، وتحملين نفسك أخطاء تستحق أو لا تستحق.. مثال: طلقني لأني كذا وكذا.. أمي مريضة أو ولدي مريض بسبتي.

8- كله منهم: هو عكس التفكير السابق.. تحميل الناس الأخطاء، وكل شي غلط بسببهم ومايعرفون يسوون شي صح وانتي بس اللي تقدرين وغالبا إما تخلين مسؤوليتك من أي شيء أو العكس تحملين نفسك مسؤولية زايدة لأنك ماتثقين بشغل الناس ..أنا سويت اللي علي بس كله بسبتهم، لازم أجي أصلح وراهم، قلت لهم بس مايسمعون الكلام... وأيضا أتوقع كلنا نعرف أشخاص في حياتنا بهذا التفكير.


أنماط التفكير هذي نمارس وحدة أو اثنين منها مع كل مشلكة تواجهنا خلال اليوم.. وحدة تقول زعلي عند زوجي ماصار له هيبة ولا يفرق معه.. 
لأنه تعود على نمطك وتعود على ردات فعلك و القرارات اللي تاخذينها ( سواء منطقية وواقعية أو غير منطقية).. 
مرة، مرتين، ثلاث.. لين ما صارت تفرق لأنه يعرف وش بتسوين.. مو معناها دارس تفكرك .. لكن من اسمه ( نمط) والنمط يعني التكرار.

وحده تقول ما أحب العمل الجماعي لأن ما ألقى أحد يشتغل ويصير الشغل كله علي، أو العكس ما أحب أشارك في الأنشطة ولا أتكلم في المجالس لأني ما أعرف أو ما أقدر أو اتخربط.. وكل مره يفرضون عمل جماعي او يعرضون عليها تقدم نشاط في الجامعة تتخذ نفس ردات الفعل.. تسوين شغلهم كله بنفسك، وإذا أخذتوا علامات نازلة قلتي كله منهم، و ترفض تطلع في النشاط ما تتجرأ تجرب حتى.

ممكن هذي الطرق وفيه أيضا طرق تفكير أخرى لكن هي الشائعة والغالب نواجهها في حياتنا.. 
طيب عرفتي طريقة تفكيرك.. كيف نتغير؟
البعض يعرف لمجرد المعرفة.. مثلا ما تظن أن التفكير بالتسويف أو تحمل الذنب أو القاء اللوم على الآخرين غلط يحتاج لتغيير!
حتى تتغيرين لازم أولا تعرفين أنك محتاجة تتغيرين إذا انتي تتبعين طريقة أو أكثر من أنماط التفكير السابقة..ثانيا الوعي بالمواقف والمشاكل اللي تستخدمين فيها نمطك في الغالب.. يعني راقبي أفكارك وشوفي.. ثالثا.. لما تعرفين وتراقبين أفكارك.. بمجرد ما تلاحظين أو تصيدين على نفسك لحظة تفكير أو ردة فعل سلبية .. احرصي على استبدالها بأفكار إيجابية.. حاولي و جاهدي نفسك تفكري بحاجة حلوة عكس اللي كنت تفكرين فيها..






تسوفين.. لا تتركين التسويف مفتوح.. أنا ممكن أهتم بنفسي وأسوي لي روتين عناية من الليلة بأبسط امكانياتي.
لا تلقين اللوم دائما على غيرك.. أحيانا انتي تكونين مقصرة، اعترفي بتقصيرك... 

والعكس، مو دائما انتي ضحية.. انتي ضحية نفسك فقط فإذا حملتي نفسك أخطاء لا تستحق وتظلي تلجلدي نفسك عليها طول عمرك.. الأخطاء واردة والسلبية واردة لكن الأهم لا تتلبسنا تماما.. لا تنوين الشر ولا تفترضين الشر من الغير، ولا تحكمي على الأمور بظواهرها، عشان كذا وعن تجربة دائما وأبدا خلي نواياك كلها في الله حتى ترتاحين.. مايحبونك تجينهم.. 

ابذلي اللي عليك وواصليهم عشان ربك، تنصحك وحدة تقولك لا تفتشين جوال زوجك انويها توبه لله قبل أي شي لأن الله نهى عن التجسس واتركيه في حاله.. إن بعض الظن إثم ابتعدي عن الظنون السيئة والإفتراضات المسبقة و فكري أن كل شي في حياتك لله وخلاص .. 

تأملي في ولدك، تربينه وتكبرينه وتعلمينه وتحطين قلبك بين يديه وبالأخير ممكن جدا يكبر ويتصرف ويعمل بكيفه خلاف ماعلمتيه وهو تربية يدك.. نفس الشي الناس اللي هم أولى بأنك تهملين ماهم عليه.. مهما حاولتي تبنين فيهم توقعي أنه ماراح يغير فيهم شي.. لكن عند ربك ما يضيع العمل، وهذا المفروض يخليك ما تيئسين أو تبدلين فعلك بفعل سلبي وسيء.. بالعربي نقولها: خلي معدنك ذهب، مايغيرك شي. انظري دائما للجانب المشرق..

فكري بنفسك، التفكير بغيرك مرهق ومتعب ينكد نومك ويبين على وجهك ...ما بيدك تغيرين كل شي حولك، انتي فقط تسيطرين على نفسك وبإمكانك تغيير نفسك والباقيين الله كفيل بهم...
تجاهلي الزلات والأخطاء إذا كان بالإمكان تجاهلها، مو عشان الناس، عشان ربك، ثم رفقا بنفسك وبقلك وتفكيرك.
تفائلي وخلي عندك مهما كانت الحياة سيئة، التفاؤل من إحسان الظن بالله، والله عند ظن عبده..


اشتغلي على نفسك وأصلحيها.. مقصرة في صلاتك، قرري وخططي كيف تحافظين على الصلاة بوقتها، ثم أضيفي السنن وهكذا.. 

مهملة صحتك، اعملي لك برنامج صحي أو راجعي دكتورة تحدد لك جسمك وش يحتاج واشتغلي عليه،.. خصصي لك يوم في الأسبوع (يوم الجمعة مثلا) لصلة الرحم.. اتصلي على أهلك وقرايبك خصوصا كبار السن، يفرحون وتسمعين منهم دعوة حلوة..


لا تجلسين فاضية، الفراغ يخليك تفكرين بسوداوية ويخليك تنبشين وتفتشين ورا الناس.. أشغلي نفسك بهواياتك، أتابع وحده بالانسقرام تجمع صور من المجلات والجرايد وتركبها مع بعض زي الكولاج.. بغض النظر لها فايدة أو لأ، هي حابه هالشي ومستمتعة فيه ومقضية وقتها بدل النميمة و التجسس والندب والبكاء،.. 


تحبين التطريز والخياطة، الرسم، التصميم، القراءة أو الكتابة، تتابعين مسلسلات في النت أو أفلام، تسوين حلى، تسترخين، تصلين سنة أو تطوع، تصومين وتقضين يومك بهدوء وتعبد، أي شي تحبينه.. 


لما تفتحين عيونك الصبح، احمدي الله أعطاك فرصة جديدة تعيشين، وانوي يومك يكون أحلى من أمس و أنك ماراح تسمحين لأي شي يتسلل لقلبك وعقلك ويشوشر مزاجك..لا تظنين أن هذا تقليل من شأنك، انتي لنفسك قبل أن تكوني لأي أحد.. الأحد هذا جايز ما يستحقك.. و الأجانب عندهم مقولة يستخدمها نساءهم لنصح بعض في العلاقات: لا تكوني امرأة تبحث عن ظل رجل وكوني امرأة يحتاجها الرجل.. كوني أفضل شيء تقدري تكونيه.



وأرحب بآراءكم واقتراحاتكم وإضافاتكم.