قبل أدخل الجزء الأخير من الموضوع بوضح أشياء بخصوص نفسية المرأة  بعد الولادة... 
قررت أكتب عنها لأني مريت بوقت كنت محتاجة أحد يقول لي فيه هذا الكلام .. فلعل وعسى توجد من تقرأ كلامي وتعرف أنها مش بس هي لحالها تمر بهذا الشيء..
نفسية المرأة بعد الولادة طبيعي جدا تكون متدهورة.. مش ضروري لكن يحصل للغالب.. 
وتبدأ تحس أن مسؤولياتها زادت وأن جسمها حايس و أن زوجها يهرب منها وأنه ... وأنه .. وأنه .. 
البعض بعد كذا طفل خلاص تتعود وتعرف كيف ترتب نفسها والبعض تصير فوضى كبيرة في حياتها وحتى في صحتها..
كل هالأمور عادية جدا و واردة..


أذكر نفاسي بطفلي الأول كئيب وتعيس .. 
في التاسع قدر الله أن زوجي نقل لوظيفة جديدة وبين الوظيفتين لازم فيه شهر يسمونه شهر إنذار حتى يخلي طرفه من الشركة الأولى ويستلم مستحقاته و يباشر بعدها في الشركة الثانية.. و قرر بنفس الوقت يشتري سيارة جديدة ..

واللي صار أني ولدت وخرجت من المستشفى وزوجي لا استلم حقوقه ولا الشركة الثانية كلمته يباشر وكل اللي وفرناه حطيناه مقدم للسيارة.. فعانينا من ضائقة مادية و زوجي بدأ يوسوس يمكن كذبوا علي وصار عصبي فوق نفسيتي السيئة..
غير الضغوط الخارجية أهلي وأهله..

ليه ماسويتوا كذا؟ الطفل يبغاله كذا؟ ما جبتوا له كذا؟  غير اني ما أعرف ولا عندي خبرة مع الأطفال ولا أحب أتعامل معاهم..
 لكن الحمد لله كل شي تم وإن كان تأخروا بسبب الإجراءات..
أيضا أنا ماعندي أخوات.. أمي اعتنت في البيبي أول أسبوعين بعدين اعتمدت على نفسي بكل شي.. 
بدون مبالغة أصحى أبكي وأنام أبكي ونومي حايس أنام في أي وقت وأصحى في أي وقت جسمي يعورني خصوصا ظهري ورجولي.. والوجبات ممكن أظل على وجبة وحدة طول اليوم..
ومشكلة شخصيتي - قبل ثلاث سنوات تقريبا - أني كنت أحط حدود كثير و ما أحب أشارك مسؤولياتي .. وهذا سبب لي إرهاق وعصبية ..
زاد الطين بله أني خلصت الأربعين قبل رمضان بيومين ..
 وتعرفون رمضان صيام ومطبخ وعبادة .. وفي العيد الناس كلها بتشوفك..
نقلت هم كل هالأشياء.. 
طيب متى بنام ؟
متى بصحى؟ .. 
متى بطبخ؟.. أحيانا أبدأ بشغله ويقاطعني بكاء الطفل و أتركها ..
متى بشتغل على جسمي؟ ( وزني أول زواجي 48 كيلو .. و قبل الحمل 50 كيلو .. و بعد النفاس 62 كيلو) .. 
وإذا لبست من ملابسي القديمة وطلعت ضيقة وماتقفل بكيت .. وإذا اشتريت لبس وطلع ضيق و قياسات ما توقعتها بكيت .. و .. و..

أما زوجي، أي كلمة يقولها أفهمها غلط..
ولو طول برا قلت أكيد هرب من البيت..و أي شي يسويه ماله إلا تفسير واحد سلبي عندي.

أخذت فترة طويلة إلى أن اقتنعت بأني مو لازم أركض أسكّت الطفل أول ما يبكي مثلا ..
و أنه إذا بكى بدون سبب برضوا عادي.. 
وأني مو لازم أسوي كل شي بنفسي .. عادي أجيب مفرزنات مثلا و على الفرن على طول ..
ومش لازم أنا و بيتي و كل شي في حياتي يكون 10 على 10.. والحمد لله أن زوجي متفهم جداً و داعم وصبور احتواني في انفعالاتي و اكتئابي.

التوتر والعصبية والجوع أخطر الأشياء هذي الفترة .. 
من تجربتي..
حصلت معي التهابات وقت النفاس و عالجتها .. 
وبعد النفاس بأسبوعين رجعت.. 
تعبت وتأذيت كثير..  وتقريبا كل يوم أتصل على الدكتورة أتشكى .. 
هي قالت لي قبل الولادة إذا ولدتي وخلصتي الأربعين لازم تجيني أتطمن عليك .. 
لما شافتني تعبانه كثير قالت بسوي لك تحليل دم كامل وزراعة ..
وجلست أربعة أيام على أعصابي أنتظر النتايج .. 
وفعلا مثل ما توقعت الدكتورة كان عندي نقص في أشياء كثيرة و بوادر سوء تغذية لأن طول النفاس شهيتي مسدودة وتغصبني أمي غصب .. 
وبعد النفاس صرت ما آكل ..
أما الزراعة فطلع عندي بكتيريا لاهوائية .. والبكتيريا اللاهوائية تجي بسبب الجسم نفسه مش من حاجة برا .. 

يعني كنت أعرف أن اهمال النظافة ممكن يسبب التهابات أو غسولات و خلطات خارجية (هذي اسمها بكتيريا هوائية) .. لكن ما توقعت أن فيه بكتيريا تتكاثر بسبب الجوع و التوتر والعصبية.. 
من ذيك اللحظة بدأت باتخاذ ما يلزم و صحيت على نفسي ..


دائما مهما كنتي مكتئبة ومتضايقة.. تجنبي التفكير الكثير ..
و تجنبي أنك تحسسين زوجك بالتملك و التحليل والتقصي ولا تسألينه تحبني؟ ماتحبني؟ أنا تغيرت؟ ما تغيرت؟ جسمي حلو؟ مو حلو؟ .. لأننا ما سألنا إلا واحنا عارفين الجواب.. 

مره قالي زوجي انتي مثل ما انتي .. طلعته كذاب وحلفته ألف يمين وكسر خاطري بعدين حسيت ما سوى عليه ... 

المره الثانية قالي إيه تغيرتي .. برضوا زعلت و سويت دراما ...
يمكن الموضوع يضحك لكن والله هذا اللي يحصل للمرأة بسبب الهرمونات ..
والرجال اللي ياخذون الموضوع شماته ونفسيات.. 
الفروض يتأملون كيف سبحان الله أبسط تغييرات الدم أو الجسم تدهور الإنسان ونفسيته وصحته ( سواء امرأة أو رجل )
أحيانا يتعذرون بعض الرجال ولو يسمعون الوحده تشكي قالوا دلع.. الله خلق أجسامكم تحمل و تولد ..

صحيح الله خلقنا مهيئين لوظيفة معينة لكن لا تتوقعون أن الوظيفة هذي مالها آثار وعواقب .. 
ترا تاخذ من صحة المرأة و جهدها و عمرها و عقلها .. كميات الدم اللي تخسرها.. كميات كالسيوم والحديد .. كميات الأعصاب والسهر .. 
و يلومونها لو تتعب وتعصب ولو قالت عندي فقر دم ولا قالت ضروسي توجعني ولا نفسيتها تعبانة لدرجة ما تقدر تتحكم بوزنها وممكن يزيد بعد الولادة .. على طول بيقولون خلاص كبرت..عجّزت..
ويبدأ يطلع ألف مبرر ومبرر حتى يهرب من البيت أو يعايرها ويهينها أو يتزوج أو حتى يخون الله لا يبتلينا ..


العبادات سكينة وهدوء نفسي وذهني و انقطاع القلب والعقل عن المحيط الخارجي فاحرصي عليها بوقتها لأنك تحاجين الهدوء والطمأنينة أكثر من أي شيء..


أيضا، دائما احتفظي بشيء يرفه عنك .. 
مثلا لو كنتي تتابعين مسلسل أو فيلم ويونسك لما تشوفينه..
احرصي تتابعينه..لأن هذا بينعكس على نفسيتك ..
تحبين كتب أو مجلة معينة .. اشتري و اقرأي ..
لا تقولين متى بفضى .. حطي ولدك بجنبك اتركي اللي بيدك واقرأي.. خصوصاً وقت ما يصحصح بالليل و ما يرجع ينام.
تحبين الرسم أو التدوين..هواياتك لا تتنازلين عنها لأنها هي اللي بتنقذك من الكآبة وبتعطيك مجال تتنفسين.



الجزء الأول هنا
الجزء الثالث هنا