نتطلع في بداية كل موسم لمعرفة الألوان الدارجة والقصات و الخامات حتى نضيفها لدولاب ملابسنا. وذكرت سابقا أن مصممين الأزياء هم نفسهم عملوا في أكثر من ماركة و دار ودربوا مصممين صغار فطبيعي تتشابه أذواقهم.
لكن ما فكرنا.. هل فيه موضة فعلا؟ ليش بعض القطع لما نشوفها نقول هذي ما تروح موضتها، و بعضها نندم لأننا اشتريناها على الموضة و طلعت ما تناسبنا !؟
بالنسبة لي.. الأناقة مسرح كبير، كل الألوان والقصات والخامات موجودة عليه..اللي يختلف فقط هو تسليط الضوء على مين والتسويق لمين. مثل الممثلين، يكونون كلهم موجودين لكن الاهتمام فقط لممثل واحد.


مثلا الآن دارج جدا اللون العنابي والبرتقالي والبيبي بينك و القفطان والفرو ..
هل يعني هذا أننا ما نلبس عنابي و بيبي بينك أبدا باقي السنة؟
والقفطان؟ طيب فيه أجسام ما يبين جمالها إلا القفطان الواسع..
أذكر أول ما هبوا بقصة البيبلوم، فيه بنات اكتشفوا أنها تجمل أجسامهم و تبرزها.. هل بيضطرون يتخلون عنها بعد فترة؟
والفرو.. الفرو جميل وأنا من عشاقه لكن بصراحة ما أشوف عندنا شتاء يستحق أني أكدس الفرو في دولابي.. ممكن أكتفي بقطعة وحدة حيادية وأستهلكها.

أنا أعترف عندي هوس تسوق.. ما أعرف أطلع السوق عشان أتمشى.. لازم أشتري شي! ومرات أرجع البيت أكتشف اني ركزت على لون وكل مشترياتي هذا اللون، أو موديل ووتطلع كل القطع تتشابه!
وإلى يومكم أحاول أسوي كنترول على نفسي .. بذكر بعض النقاط والأمور اللي ممكن تساعدك تتسوقين بذكاء مثل ما ساعدتني..


في البداية اطلعي على خطوط وقصات الموضة الجديدة عن طريق المواقع والمدونات والمجلات .. وحددي اللي يناسب جسمك وستايلك و لون بشرتك.. لا تفكرين أنك مجبورة تشترينها كلها.
ادخلي مواقع محلاتك المفضلة أو برامج الجوال الخاصة فيها وشوفي المتوفر عندهم ( بيرشكا، زارا، مانجو، ستراديفاريوس، برومود، اتش آند ام..)

حددي القطع واحتفظي بصورها في جوالك مع أسعارها إن توفرت ..ثم قرري ميزانيتك بناء عليها .. يعني لو بتعملين تنسيق ولوك كامل كم راح يكلفك مع الجزمة أو الكعب والاكسسوارات والشنطة ؟

بعدين شوفي وين بتروحين .. مثلا أنا إذا ناوية أتمشى وأشتري عشوائي ومافيه أي فكرة في بالي عن اللي بشتريه، أروح للظهران مول.. لكن لما أكون عارفه ومحدده قائمة باللي أبيه، أروح أي مول صغير فيه المحلات هذي.. غالبا ابن خلدون أو دارين.. حتى ما أدور كثير ويضيع وقتي و أشتري أشياء ما أحتاجها.

لما تشترين، الأفضل دائما تنسقين لوك أو طلة متكاملة، يعني تشترين البلوزة مع البنطلون أو التنورة والاكسسوار حتى ما تضطرين ترجعين السوق مره ثانية تدورين تكملة التنسيق. أو إذا في دولابك قطعة صدف انها على الموضة لكن مافيه حاجة تناسبها، خذيها معك ونسقي عليها..

لماتشترين قطعة، لو حسيتي بـ 10% تردد من ناحيتها ، لا تشيلي التاق عنها واحتفظي بالفاتورة، وأعطي نفسك فرصة، أسبوع مثلا وشوفي هل اقتنعتي بها، هل بحثتي ولقيتي أفكار ممكن تطبق عليها، وقتها شيلي التاق، وإذا لأ بدليها أو رجعيها.

وتجنبي تطلعين السوق في مجموعات أو قروبات، أدري صعبة، لو بتروحين مع أحد احرصي أنه ما يغير رايك أو يقنعك بشي ماتبينه ..أدري أصعب وأصعب ..!
أيضا لا تصدقين كل شي يقوله موظف البيع، لأن أصلا هذي وظيفته، يسوق لك ويخليك تشترين اللي هو يبي مو اللي انتي تبينه.

الماركات والأسماء الكبيرة، إذا ما عندك مقدرة عليها لا تفكرين فيها، ولا تفكرين في تقليد لها.. يعني لو اللي يعرفونك كلهم يعرفون أنه دخلك ما يتجاوز 3 آلاف ريال وشافوا معك شنطة شانيل سعرها في السوق 14 ألف و فوقها، ما راح يقولون اغتنت ولا صار معاها فلوس..بيقولون تقليد و تطلعين بمظهر رخيص وبايخ.

 بعض المحلات الآن صارت تنزل نفس التصميم، يعني زارا من فترة منزل شنطة تصميمها يشبه تصميم شانيل بوي، و ألدو منزل نفس تصميم سيلين،.. راح تقتنعين بها وبسعرها إذا انتي ناويه تشترين التصميم، إذا انتي تشترين الاسم هذا شي ثاني..

كوني واقعية مع نفسك، حتى لو دخلك مثلا 10 ألاف ريال، لكن تعرفين نفسك تملين بسرعة وتحبين تجددين و ما تعيدين لبس أغراضك مره ثانية، ليش تشترين بالمبالغ المرتفعة و تغيرينها بعد فترة!؟ ممكن تستثمرين المبلغ في مجوهرات تستحق السعر و تجلس معك عمر..طبعا أنا ما أقول لا تشترون أبدا.. لكن هي قناعات و واقعية وصراحة مع النفس وفروق شخصية..



بعض البنات عندها معتقد تؤمن فيه، أن الأناقة والكشخة عند الهاي اند براندز أو دور الأزياء المشهورة و المصممين المعروفين، وكل شي من عند غيرهم سيء وخلاقين و زبالة.. وحتى لو ماديتها وسط تضغط على نفسها و تتأزم عشان بس تجاري المظاهر اللي نشوفها الآن في الانستقرام... للأسف أدخل كل الحسابات ألاقي شانيل و ديور.. طيب مين اللي يشكي من غلاء الأسعار وتلاعب التخفيضات والراتب ما يكفي الحاجة، إذا الشعب كله من الطبقة المترفة؟ 

لا يفهم أحد أني ضد اللي يشترون ، أنا ضد ترويج المبدأ..دور الأزياء العالمية كل سنة تطلع بتصميمين أو ثلاثة مقبولة والباقي سيء و مرفوض و يوصل للتهريج ..لكن بطبيعة الحال ماراح يعملون عرض كامل عشان لبس أو لبسين..فيحطون أي شي ! والناس تشتري بس لأنه من البراند الفلانية.. والذوق العام في انحدار مستمر!

من تجربتي ،مع الوظيفة ما صار عندي وقت ألبس القطع اللي في دولابي، ولا عندي وقت كثير للجمعات والخرجات، في الدوام أوقات أكون رايقة أنسق لبسي الصباح و أكشخ، وأوقات مالي خلق يادوب كاجوال، بوي فريند جينز و أي بلوزة و أمشي،..فحتى لما أطلع أتسوق أفكر بيني وبين نفسي أنه عندي لبس ما انشاف ولا لبسته للآن..

فيه طريقة تعلمتها من صديقة الله يذكرها بالخير، كانت تقول في بداية كل موسم - الصيف مثلا- أعلق ملابسي في الدولاب بالمقلوب ( يعني العلاقة تكون عكس اتجاه السحب ).. و إذا خلص الصيف والعلاقة للحين مقلوبة معناها مالبسته ولا راح ألبسه لأن الموسم تغير وإذا موديلها صرعة وموضة ما راح ألبسها السنة الجاية.. هذا يساعدك تقررين اللي تحتاجينه واللي ما صار يناسبك أو اتجاه ذوقك لوين ..



أوقات التخفيضات تغري بالشراء .. ونشتري على أمل نلبسها أو يمكن نحتاجها.. وقت التخفيضات استغليه بتكملة الناقص في دولابك من الأشياء الأساسية.. قميص أبيض؟ كعب نيود؟ جينز جديد؟.. وابتعدي عن الصرعات والموضة والقطع الغريبة ما تتوهقين فيها بعدين.. حدها قطعتين ثلاثة في دولابك

العرايس وقت التجهيز يحتارون ويشيلون كل السوق.. وبالأخير ما تلبس نصهم.. 
اختاري قطع أساسية بألوان حيادية.. مثلا : سكيني جينز، تنورة قصيرة رمادية، فستان أبيض و شوز نيود .. ونسقي معاها الألوان الثانية بالتيشيرتات أو الاكسسوارات حتى تجدد اللوك وماتملين.. خصوصا أنك بتشترين بعد الزواج كثير.

أخيرا، التسوق عن طريق الانترنت ممكن يوفر وقتك وفلوسك.. لأن غالبا يكون فيه عروض خاصة بالموقع ماتكون موجودة بالمحل، أو تقدرين تشترين بأي وقت يناسبك وانتي فغرفتك ويمديك تمخمخين على القطع وتنسيقها.

* الصور كلها من مسلسلاتي المفضلة *